За вуч ийин... 76

За вуч ийин ин харап1а
          дуьньяда заз гел тахьайла,
Инсаф тийиз кесиб инсан,
          сеймишдай са эл тахьайла,
Ашкъидикай магьрум ийиз,
          жув к1ани гуьзел тахьайла,
За вуч ийин ин харап1а
          дуьньяда заз гел тахьайла.

Зи муьгьуьбат лувараллаз
          цавуз фирай мелек хьтин,
Зун уьмуьрдин к1урарик ква
          эхлягьай са пенек хьтин,
Бегьер к1ват1из ава гьар сад,
           са зун ама хенек хьтин,
За вуч ийин ин харап1а
          дуьньяда заз гел тахьайла.

Са эхтилат дуьз лагьайт1а
          вири жеда хъуьрер ийиз,
Зазни к1андай рик1из чими
          юлдаш галаз сирер ийиз,
Яб гудач алахъайт1ани,
         на к1ани кьван эвер ийиз,
За вуч ийин ин харап1а
         дуьньяда заз гел тахьайла.

К1анидан заз п1узаррилай
          ягьанатдин хъвер акуна,
Фагьумна за; адаз зи къул
          бегьем эйбежер акуна,
Гьа и ч1авуз зазни зи гьал
          мадни бешбетер акуна,
За вуч ийин ин харап1а
          дуьньяда заз гел тахьайла.

Я хъел хьанач, я шел хьанач,
           я садра кьван мез-гъвел хьанач,
Эх авунай язух рик1и,
           я сад вичихъ ц1игел хьанач.
Эхир, яраб гьик1 къведат1а?
          Зи ашкъидихъ эвел хьанач,
За вуч ийин ин харап1а
          дуьньяда заз гел тахьайла.

Садазни гьич хьанач гьайиф,
         хьайи ч1авузни зун зайиф,
Са эл к1андай жуван кьулухъ
          ийидайвал са к1ус тариф.
Гьич аватнач кайи хурал
          к1ани рушан атирлу киф,
За вуч ийин ин харап1а
          дуьньяда заз гел тахьайла.