Я кьей ашкъи, вакай низ юлдаш хьана. 71

Я кьей ашкъи, вакай низ юлдаш хьана,
Бахт я лугьуз зи уьмуьр кармаш хьана.

П1еркьи вилер, дагъ къалуриз аск1ан яз,
Зи мурадар къалурзава кьакьан яз.

Къастуникай метлеб ийиз сефердин,
Къе сад, пака масад лугьуз иерди,

Ашкъи ийиз и дуьньяда кьилинди,
Маса гьалар кьат1униз лап четиндиз.

Гьинва гила зи уьмуьрдин уст1арар,
Суст ийиз зун, авуд тийиз ахварай.

Муьгьуьбатни вуч я, жаваб тахьайла?
Са карни дуьз къведач саваб тахьайла.

Гаф авай туш муьгьуьбатдиз, иер я,
Рик1ин къене куьк1венавай эквер я.

Жаваб хьайи гьисерин кар давам я,
Жаваб хьайи гьисер гуьзел илгьам я.

Вуч авурай, жуван хийир чир тахьай
К1анидаз за, ашкъидиз фикир тагай.

Вуч ят1ани, бат1улвал зи чандава-
Пучна уьмуьр маралдин, лишандавай.

К1евна жигъир, ракъурна руш къужахдиз
Са кьвезекан. Фикир гуз и к1валахдиз,

Тахсиркар зун хьанва, ашкъи себеб яз.
Им яни заз гайи гьая, эдеб яз.

Назик са к1ел гьатна хура чакъалдин,
Зунни хура гьатнава гьак1 ажалджин.

Гуьзел хиял терг авун, зи тахсир я;
Гъил къачурай, им фагъирдин эхир я.

Инсаф амач, регьим тахьай зи чандиз,
Гуьзел жаван гьатна гъиле душмандин.

Чан аламаз куьчуькна руш зегьемда,
Заз эхир к1вал хьанва гила жегьнемда.