Вуч хъсан я и дуьньяда мертебадин тагъ авайдаз. 70

Вуч хъсан я и дуьньяда
          мертебадин тагъ авайдаз,
Ажеб гуьзел ширин-шекер
          къанси, ичин багъ авайдаз,
Рик1ин къене ялав куьк1уьз
          умуддин чирагъ авайдаз,
Я тахьайт1а дустар кьула
          са к1ус дуланажагъ авайдаз.

Муьгьуьбатди гатфар кьиляй
          чан хгана т1ебиатдиз,
Гуьрчек атир-цуьквер кьула
          алк1урна зун хажалатди,
Мич1и ийиз зи югъ-аям
          яваш-яваш мусибатди,
Кьураз-ц1раз зайифарна
          зиян гана сагъ авайдаз.

Жуван гьалал жуван к1ула,
          вуч ят1ани заз чан авай,
Гагь шадвили ац1урзавай
         къулай, гъвеч1и макан авай,
Сугъул хьайи йиферизни
          са эрзиман дарман авай,
Зи хиялни пуч хьайила,
          вуч лугьун уьзягъ авайдаз.

Ви мергьемет чан гьинава,
          закай ваз душман хьайила?
Ви саваб игьсан гьинава,
          зи партал кафан хьайила?
Зи рик1ин дарман гьинава,
          вунни са лукьман хьайила?
И гьалдикай дерди жедай
          са к1ус къанажагъ авайдаз.

Вуч бат1ул я бейни-гачал,
          ви акунар хуш хьайила?
За вуч лугьун, рик1 кьуразва
          муьгьуьбат бейгьуш хьайила,
И гьалдикай гьик1 хабарда,
          зун т1акьаз уьтмиш хьайила,
Тахсирар мад артух жеда
          рик1 са к1ус начагъзавайдаз.

Яланчивал хиве кьамир,
          къулай хиял тапарар я,
Дуьньядин гьал, килиг хъсан,
          парабур буш хабарар я,
Ашкъидин, заз атай нурар-
           абур кьисмет кьадарар я,
Куьз герек я хийир-гьалал
          югъни йиф дустагъзавайдаз.