Азаб ч1угваз, рик1, за ваз вуч авурай,
Дертлу хьайи, заз ви перде такурай,
Ашкъиди лап зарафатни авурай.
Ван хьанани? Адахъ маса яр ава.
Авачирлай им вуч мусибат хьана,
Вуч я тахсир, зун ик1а барбат1 хьана?
Югъди- йифди мад са хажалат хьана.
Ягьантарин, ийидай, кьадар ава.
Пек яни зун, к1вач гекъягьиз алудиз?
Сеймиш тийиз, ашкъидивай къакъудиз,
Зазни к1ан я вирида хьиз умудиз.
Зи умудар цифериз ухшар ава.
Къван хьанани ви рик1икай, хуравай,
Язух къведай вагьшидизни ч1уравай,
Зун мейит туш чан аламаз суравай,
Гьар садазни вичин са азар ава.
К1ант1а килиг, муьгьуьбатдив алвериз,
Ивидин селлер авахьай вилериз,
Садни жедач залай гъейри мич1ериз
Ваз экв гудай, цавара гъуцар ава.
Азаб ч1угваз, рик1, за ваз вуч авурай. 68
© Copyright: Магомед Мирзоев Мирзой, 2022
Свидетельство о публикации №122101807590
Свидетельство о публикации №122101807590
Рецензии