Десте-десте рушар физва булахдал 61

Десте-десте рушар физва булахдал,
Гуьрчекдаказ алук1на буй-бухахдал.

Назлу абрун юкьвавай са гуьзел я,
Жегьиларни ам акунихъ ц1игел я.

Зарафтариз, хъуьрерзава рушари,
Сад садалай иер, гуьрчек таяри.

"Мубаракрай Назлу ваз ви к1аниди,
За яб ганай накь ви ярди манидиз.

Кьуразва хьи жегьил ви т1вар тикрариз,
Ялвар ийиз ацукьнавай гъуцариз",-

Ик1 лагьана са руш вилик екъеч1на.
Мадни са руш зарафатиз эгеч1на:

"Акунарни девлет авай гада я,
Чан Назлугуьл, ваз ам хъсан далда я.

Фагъир авай билбил хьиз кур-кур хьана,
Тахтадикай патахъ са чунгур хьана.

" Рик1 багъишда за ярдиз - аманат я,
Ам такурлай заз бегьем хажалат я"

Мадни ишел-хвал авахьиз симерал,
Ацукьнавай мани лугьуз кимерал".

Мадни са руш хъуьрер ийиз рахана.
Хъел атана Назлуди ик1 лагьана;

"Регъуь хьайт1а хъсан я, кьей к1ват1ашар,
Гьинва намус, куьн яни зи юлдашар?

Набутдикай зарафатун дуьз яни?
Тахьайт1а им куь намусдин гуьз яни?

Гьинва регьим, язух шей квез а касдин,
Етимдаказ, кьулухъ тахьай са касни.

Югъди-йифди кьве капачдив чил гатаз
Фагъир ава дерт рик1еваз, кьил гатаз.

Ашкъидикай дерт хьанавай кесиб я,
Квез адакай зарафатун айиб я.

Ашкъи ава а фагъирди келледа,
Куь фикирар авай гьал я тевледа.

Мални девлет куь уьмуьрдин эвел я,
Куь хиялрал тажуб я зун, мягьтел я".