Гуьрчеквилин тариф авун айиб туш 59

К1ан хьайит1а садаз идан рехнеяр
Малумариз, авун патал тегьнеяр,

Минет хьурай, изин гумир и кардиз,
Сифте килиг жуваз, жуван азардиз.

Чарадакай рехне акун регьят я,
Им алчахдин негьякьан хасият я.

Мумкин я уст1ардик, вичик гъалат1ар
Пара хьунухь, бат1ул ийиз алатар.

Шак атайла, зунни фена, гьаятда
Чунгурдив эгеч1на, лап гьакъикъатда.

К1ерецдин тар авачирди акурлай,
Гьинай-гьанай кьве тахтад к1ус жагъурна.

Яна масмар, сад муькуьдал эцигна,
Ч1угуна сим, фад мукьамдал элигна.

Ширин сесер атайлай фикир хьана,
Етимд алат керчек тирди чир хьана...

Ахмакьдаз вич акьуллу хьиз аквада,
Эдеб патал, мисалар гъиз рахада.

Герек яни ахмакь касдиз акьул гун?
Мумкин я вун адан вилик бат1ул хьун.

Ахмакь - п1ир я лал береда, балугъ хьиз,
Тахьайт1а ам рахаз жеда шулугъ из.

Вуч тахсир я, я Аллагь, и аялдин,
Атканавай къужахда хьиз завалдин.

Белки адаз яб гудай ваз вахт авач?
Гьавиляй а фагъир касдихъ бахт авач...

Яваш-яваш шулугъдин ван акъатна,
Хуьруьнбурук къалабулух акатна.

Са яшлуда ацукьнавай кис хьана
Ик1 лагьана:" Имай лап силис хьана".

"К1вал ч1ур жеда",- лугьуз масад рахана.
Гзафбуру кардин эхир кьат1ана.

"Аквар гьалдай, идан эхир хъсан туш,
Гьак1 ят1ани, хата авач, зиян туш.

Делидан кьил кьурт1а, беябур жеда,
Адан къимет, дамах, абур ч1ур жэеда.

Мансурни са т1вар-ван авай итим я,
Язухни я и кесибдин: етим я.

Дуьз лагьайт1а, фагъирдин дерт пара я,
Мад вуч ийин, бегьем са бейчара я.

Назлу т1арам, гъил-к1вач авай са руш я,
Амай вири хуьруьнбурузни хуш я.

Гуьрчеквилин тариф авун айиб туш,
Ашкъидикай рахайдини къариб туш".