Седеф сарар, мерженар къугъваз хурал,
Аста-аста камар вигьизвай марал,
Югъди-йифди ви гелера зи хиял,
Кьарай квахьна, къекъвез ава, Назлугуьл!
Хуш акунар, жегьил-жаван бахтавар,
Малаикдиз цавараллай вун ухшар,
Аман-минет, тахьурай ваз бедназар,
Са гаф гъваша ви мецелай, Назлугуьл!
И саягъда уьмуьр тухун азаб я,
Кабаб рик1из авайди са т1алаб я,
П1узаррилай хъвер алахьун саваб я,
Ширин-ширин хъвер ая заз, Назлугуьл!
Фикир ая - им вуч хийир-шир хьана:
И дуьньядал мадни са фагъир хьана.
Назлу, закай ашкъидин есир хьана.
Зи умуд, зи кьинер-агьтер, Назлугуьл!
Акур туш заз мад са касни ин саягъ:
Есир хьана акурлай ви буй-бухах!
Гьалал я ваз дамахдивди гьар к1валах,
П1узарарни лали-гевгьер, Назлугуьл!
Етим Керим, гъилевайд чунгур лугьуз,
Ч1ур хьайиди зи фагъир уьмуьр лугьуз,
Ялав кьуна киснава - сабур лугьуз,
Регьим ая ин зи тегьер, Назлугуьл!
Ширин-ширин хъвер ая заз, Назлугуьл 58
© Copyright: Магомед Мирзоев Мирзой, 2022
Свидетельство о публикации №122101503767
Свидетельство о публикации №122101503767
Рецензии