Яваш-яваш йикъар гьа ик1 къвез фена. 57

Сафунив яд акъудналди виревай,
Атайт1ани вири жемят хуьревай,

Гьакъикъатда, виш йисарни т1имил я:
И к1валахдин зун шагьид я, векил я.

Акьуллуда кьил кьадай туш и кардин,
Акьулсузди гъиле ава азардин.

Деливилихъ ава вичин кьет1енвал,
Деливили гагь вегьида эхъен вал.

Авурт1ани пара кьадар фагьумар,
Садавайни хьайи туш ам алцумар.

Сифте кьадам вегьенмазди накьвадал,
Ахпа адан гъавурда чун акьада.

Авамвилин гунагьар чи пара я,
Чиз-чиз авур гунагьар са хара я.

Чиз-чиз авур гунагь бегьем агъур я,
Авурдини тийижиз чаз ахмур я...

Ашкъидикай катайт1ани хийир туш,
Ялавдин ц1у кайидини тахсир туш.

Кесиб-девлет, вири адаз муьт1уьгъ я,
Яб гайит1а, рик1е авайди ц1угъ я.

Ашкъидин ц1у кайидан кар четин я,
Гагь жазани авун вичиз мумкин я...

Ахмакь касдиз акьулдикай файда туш,
Ахмакь касдиз туьгьметни я къайда туш.

Гагь ахмакьар чаз аквада аси яз,
Рахай ч1авуз чи къайдайриз акси яз.

Усал, ахмакь, вуж ят1ани инсан я,
Жуван хивиз вегьенвай бейниван я.

Гьавиляй, гьар са кьадамдиз фикир гуз,
Жуван рик1из са вахтара таъсир гуз.

Алук1на хам жувал жуван бендедин,
Килиг тийиз я гьалдиз, я вядедиз,

Жувахъ галаз тухун к1ан я виликди,
Аллагьд патай ганавай са шерик хьиз...

Четин к1валах гьатнава къе хиве зи,
Хата авач, гьимай дуьз я деведин.

Зегьметдал рик1 алай хъсан гьайван я,
Мандавар тахьайт1а бегьем балк1ан я.

Гьавиляй, гагь ацукь ийиз яргъа хьиз,
Килигзава бендедиз зун агъа хьиз.

Бязибуру лугьузва: "Малум хьана,
Т1имил ава, мадни са Межнум хьана".

Межнум ашкъи себеб хьана дердерик
Дели хьана акъуднавай чуьллериз.

Керим гъвеч1и ч1авалай са усал тир,
Гьинай-гьанай рахаз зайиф аял тир.

Амма вичяй, к1усни квачиз тапарар,
Гагь акъатдай лап акьуллу хабарар...

Белки бахт я - бахтлувал хабар тахьун,
Бахтикъара т1вар алай азар тахьун.

Арха тахьай етимдин гьал четин я,
Алчах дустар тахьайлани секин я...

Яваш-яваш йикъарни ик1 къвез фена,
Керимал мад хуьруьнбур хъуьрез хьана.

Лугьун лугьуз мучхулат яз кимерал,
Гьинай-гьанай туьк1уьр ийиз эсерар.

Гагь акьуллу гафар вичяй акъатдай,
Алахъ хьана акъудиз сес алатдай.

Усалдаз зайифд акурлай хвеши я,
Зайифдан ам кьилел бегьем вагьши я.

Амма Керим зайиф лугьуз тек тушир,
Куьмек патал адаз кас герек тушир.

Арха адан пара зурба къачах тир,
Кериман ам дамахни гьак1 даях тир.

Къуьнер бегьем са кьвал хьтин гьяркьуь тир,
Бязибуруз адакай лап къурху тир.

Ягьантарихъ гьавиляй кьадар авай,
Етимдизни идакай хабар авай.

Рик1 аладриз ам кимерал къугъвазвай,
Мучхулат я, лугьуз вири рахазвай.