Кесиб Керим 53

Кесиб Керим лугьуз, хуьруьн агъадал,
Уьмуьрзавай фагъирди са къазмада.

Жегьил аял кашар-мекьер гуж хьана,
Хуьруьнбуруз ам гьамиша бурж хьанай.

Авамвиляй, усалвиле аткана,
Идаз-адаз лук1вал ийиз дат1ана,

Са к1ус фуахъ я югъ, я йиф талгьана
К1валахзавай фагъирди, ям ат1ана.

Хатур ханач, гунагь лугьуз халкьари,
Юхсулвиляй язухзавай таяри.

Гьайиф лагьай ламра к1ула гьамиша
Кьве пар жеда, хъсандаказ дуьзмишай.

Муьт1уьгъ инсан, ваъ талгьана к1валахдай,
Ягьсузарин аткида фад къармахда...

Йикъар-йифер акъатзава ч1ехи жез,
Яваш-яваш кьилни ава рехи жез.

Са сеферда нисинихъди куьчедал
Ацукьнавай жегьилар са жергеда.

Яргъарилай, зар-зибадив ч1агурна,
Фейи руша гададин рик1 ц1урурна.

" Керим, килиг гуьрчеквилиз Назлудин,
Сувал алай ухшар авай бубудиз.

Адакай ваз девлет авай свас жеда,
Ви к1вални къул бегьемдиз сарас жеда".

Кайи чандиз кьел вегьейт1а гуж жеда,
Зайиф хьайи келле, беден пуч жеда.

Акьуллуди зарафатдин гъавурда
Акьада фаз, эхирни гъун тавурт1ан.

Сагъсуз касдиз, айиб алач, зарафат
Лап рик1ивай жеда, ийиз хажалат.

Зегьмет ч1угваз югъди ам са гьал хьана,
Йифди ахпа фагъирди рик1 сал хьана.

Дертлу инсан яргъалайни аквада,
Гагь чинеба вич вичивди рахада.

Яваш-яваш зарафатар таб хьана,
Ашкъидин дерт Керимаз азаб хьана.

Етимди гьал акурбуруз чир жеда,
Кузни- хъукъуз вичикай фагъир жеда.

Ашкъидизни кьадардин сан хьайид туш,
Я садазни ада динжвал гайид туш.

Бедбахт бала! Гъам алахьиз вилерлай,
Ст1ал-ст1ал физва, кьежиз, пекерлай.

Гагь ахмакьданни акьул пайгар жеда-
Дуьньядикайни жизви хабар жеда.

Вуч авурай, хъуькъверагдиз дерт авай
Гуьзел рушахъ мал-къара, девлет авай.

Делидан кьил деливилел зурба я,
Масадбуруз адан крар туба я.