Кесиб Керим 52

Тахьурай сад есирда гъам-гъуссадин,
Пар тахьурай ашкъидикай гъурсадин.

Бенде я зун, уфт авуна руквадиз
Чилел гъана, гьая хьанач хуквадин.

Лук1 хьайила сирлу, ажеб къастарин,
За яб гузва мана дерин тарсариз.

Зи гъил кьуна кхьейла са шумуд ц1ар,
За гьик1 лугьун - зун я бендерин уст1ар.

Минетзава, куьмек ая гьар ч1авуз,
Алуд ийиз рекьел атай гьаясуз.

Са т1алабун мадни ава Феледиз,
Чун фейила са фагъирдин куьмекдиз,

Чи ниятар дугъридивай къакъудмир,
Умударни дегьне к1арц1из авудмир.

Гьар са касдиз чилел са метлеб ава,
Фагъирдикайни чаз са эдеб ава.

Вуж ят1ани, инсан лагьай т1вар ала,
Чунни адаз са кьадар ухшар ава.

Чун Адаман балаяр я, гьар са кас,
Гьавиляй чи рик1ериз гьуьрмет я хас.

Дугъривални девлет я чир хьайит1а,
Зурба рик1ин къаст я фикир гайит1а.

Аткайт1ани зегьерда чеб угъридин,
Аламат я- квахьдач гьевес дугъридин.

Михьи рик1е зегьердивай къваз жедач,
Михьи рик1е намусдин тек наз жеда.

Са ахмакьда фурс ийида ц1арц1арал,
Гьая, намус фейи ч1авуз ахварал.

Чи винизвал са зерре я мефт1един-
Эхир аку, ахпа аку сифтеди.

Са ч1авузни дугъри тефий рик1елай,
Ахар са гаф алат тахьуй мецелай.

Ужуз кьамир язу, фагъир жувалай,
Алцумариз, къвазна жуван къавалай.

Гьа сад хьтин накьв я вири авурди,
Садаз уьмуьр ганва т1имил агъурдиз.

Назик уьмуьр залан хьайла бендедиз,
Са югъ экуь жагъанач мад вядедиз.

Гьалал хьайи ягълуни к1араб хьана,
Асул-фикир уьмуьрдинни таб хьана.

Нагагь са зат1 усал яз ваз акурт1а,
Гъавурдани, гьавиляй, кьун тавурт1а,

Килиг хъсан жуван акьул-келледиз,
Гъиле твамир намус кьац1ай гьилледин.