Хцин гьайиф

Рикl ацlанваз дердерив,
Рахазва зун гъетерив.
Буба ава виридаз,
Зун чир хьанач хайидаз.

Аял тирла кьатlанач,
 Дидедихъ зун ягъанач.
Заз чlехивал акуна,
Гъавурдани акьуна,

Бубадиз зун акунач,
Четин юкъуз гъил кьунач.
Агъзур манат,,алимент",
Гьам тир заз адан куьмек.

Шумуд йис я такуна ,
Гьич хабарни такьуна.
Авачни ви къене рикl,
Буба яни вун са сикl?

Рази я зун кьисметдал,
Хвейибурун гьуьрметдал.
Са дарвални акунач,
Я тlарвални хкlунач.

Бубади зал алукlнач,
Рикlяй- рикlиз агуднач.
Социалькадин пекер,
Къачудай зурзаз гъилер.

Гьич садрани адетдал,
Тухванач зун мектебдал.
Я рикlелни атанач,
Чан хва,- лугьуз раханач.

Буба аваз чан алай,
Хабар кьунач гьич завай.
Куьтягьнани на мектеб?
Вуч я ви мурад-метлеб?

Зун аял туш кьатlизва
Писни-хъсан заз чизва.
Гележегдихъ умудлу,
 Камаралди зун физва.

Аллагьди заз куьмекда,
Белки бахтар кьисметда.
Къведа буба ваз вахтар,
Жедай заз хьиз гьайифар.