Ана къарнашыма...

Къатым бла озгъан къатангы джашха
Сен болурменг деб, къарадым джити
Ол а сен тюл, ол а - башха...
Кёзюме урду джыламукъ джилтин.

Орамда тохтады акъсыл-мор мешна:
Сен чыкъсанг андан деб, болдум умутлу...
Ол а сен тюл, ол а -башха.
Кёзюмде ойналла къарангы булутла..

Хурджунумда телефон таушха
Сенми джаздынг деб, ашыгъыб алдым,
Ол а сен тюл, ол а - башха,
Сора тюнгюлюб, ызына салдым...

Хасан аттяны юйдегиси
Бир кюн къоймаек "чатда" сёлешмей,
Сен къоюб кетдинг хар кимни кесин...
Энди олтурабыз, киши бла кюрешмей...;

Кюн чыкъгъанлай, танг ашхылыкъ береенг...
Джамагъатдан хаман хапар сораенг...
"Ашхылыкъ кёр ариу дядячыгъым" - деем,
Аны эшитсенг, къууанч аллы болаенг...

Ой, анамы джандан сюйген къарнашы,
Къалай кетдинг, джюреклеге чанчыб окъ...?
Аттябызны къартлыкъ джашы, бал джашы...
Аття да джокъ..., ання да джокъ..., сен да джокъ......

Ашхы Аллахым, сени ишинге джокъ мадар,
Бойсунабыз, джюрекле бола такъыр
Ёксюзлеге Сен бир джаз джарыкъ къадар,
Срапилни да Джандетинге бир чакъыр;