Къужахда са цуьквер авай яйлахдин
Яд ргазвай чешме авай булахдин.
Рекье жедай, къуьн агажна парари,
Рушар, сусар, нур гуз цурун кварари.
Бичинчини лежбер анал илифдай,
Яд дадмишай, мугьмандини тарифдай.
Налугьуди, лезги чилин къаймах тир,
Чи дагъларин нямет авай чанах тир.
Лап чIуру кар авуна са чубанди,
Ийидачир гьатта залум душманди.
Вич квай кас тир ам, нагьакьан хесетар,
ЧIурна ада дагъвийрин пак адетар.
Гьа чешмедин кьилел хандакI парахдин
Ягъна ада, чIурна ери булахдин.
Ада вичин намус-гьая квадарна,
Чиркинарна, гьамгадин яд мурдарна.
Гимредин ниъ, фитерал луж тIветIерин…
Галатна кIвач яйлахдихъай къветерин.
Ампайрини чка кьуна ятахдал,
Инсанривай хъфиз жезмач булахдал.
ГьикI эхзава чили ахьтин алчахар,
Чиркинардай михьи рикIер – булахар?
Къужахда са цуьквер авай яйлахдин
© Copyright: Тамила Хуршидова Салманова, 2022
Свидетельство о публикации №122071406173
Свидетельство о публикации №122071406173
Рецензии