Зи ял ягъун

За ял  ягъун кьетl авуна  хтулрихъ галаз,
Рикlин къене чка ганвай дулдулрихъ галаз,
Кьунватlани бирижри чин рехивили кьил,
Кlанивилин гьиссери зун авунва жегьил.

Ийизвач за кlвалахдикай са кlусни фикир,
Кутадай кас авач синих  , я гьич  са тахсир.
Гьар суалдиз жавабни гуз чина аваз хъвер,
Акъваз тийиз  ийиз   кlанда ,, Чан"- лугьуз туьмер.

Къугъвазва чун ,хъуьрезва чун, ихтилатар бул,
Яшарини шандакьзавач тежервал кагьул.
Югъ няналди гьикl физватlа  аквазвач чаз вахт,
За Аллагьдиз икрамзава гайи заз и бахт.

Пагь гьикьван заз гузва лезет , галатни жезвач!
Месик квайбур къарагъдалди кьарайни къвезвач.
Гьабурухъ галаз жувни хьанва са кстах аял,
Гьич санани амач валлагь кьуьзуьвилин тlал.

Хъфидай вахт  мукьва жерла  рикl жезва зайиф,
Зи балайри сузадалди чlугвада гьайиф.
Къведай йис мус къведатlа чаз,  вахт фидатlа фад?
И  суалди агудзава  рикlерин мурад.
 
Саламатдиз хуьх чан Аллагь зи рикlин кlусар,
Бахтуникай це ман пайни  бес жедай кьадар!
Минет хьурай сад тир  Аллагь ая абур шад,
 Мад зи рикlе авайди туш гьич маса мурад.