Хъел атайдаз лугьудай гьатнава деб: эрмени я!
Вуч бала къвезватlа, чаз чизва себеб эрмени я.
Виридаз акси хьана, гьахъ рахадайди аватlа,
Ттум гилитlда чна гьасят кьуна еб: эрмени я!
Лап вичихъ кlантlа савад хьуй, къуй хьуй ам эгьли - камал,
Хьайитlани кlани кьван ягьни эдеб: эрмени я!
Цан цанач, ник атанач, гьим я гунагьдин ийеси-
Хтанач цурун тlунал йифиз са хеб? Эрмени я!
Гад мекьи, зул хьана фад, кьуьдни мишекъат атанач,
Мадни батlул кьазава, ийизва себ: эрмени я!
Шезватlа лап са аял, мам вугунални хъухъвадач,
Туькуьрай уста, са шеъ хьи, гъвечlи кьеб - эрмени я.
Чахъ авач тек са дакlан тlул, вирина чун михьи я,
Какадин лазни я чун, къибни, хъиреп - эрмени я.
Месикай къвез хьайитlа чаз са таниш ни, я флан -
Туш силин фуни, адан багьна я чеб, эрмени я.
02.07.2022 г.
Эрмени я
© Copyright: Намик Фарзалиев, 2022
Свидетельство о публикации №122070401169
Свидетельство о публикации №122070401169
Рецензии