Вакни сев...

Хурхарай бегемотди,
Тlам галайнихъ гьарагъиз,
Вич ничхирриз ламатlди,
Къалурзавай агъа хьиз.

Гъиз авамар къугъунриз,
Вири гъилиз къачунвай.
Кьацlай вирин къанунриз,
Абур табий авунвай.

Садаз ришвет, садаз кичl
Гуз... муькуьдаз гьелягь кьаз,
Виле тунвай ада вич,
Жез кьван яцни гьеллебаз!

Вуч тlурус я, вуч я таб,
Асул квелла течиз кар,
Ахмакь яцраз гана яб,
Алцур хьанвай ничхирар.

Тlама физвай краркай,
Тек сев тушир хабардар.
Цlийиз кватна ахваркай,
Акъатнавай магъардай.

Жезвайбурухъ тахьана,
Сев квай вичин кеспидик.
Кlусни фикир тагана,
Кьил хуьзавай кесибди.

Бегемотдиз акуна -
Сев туш ам гьич сая кьаз.
И кар ада акьуна:
Къахчуна кlанда кьисас!

Де вичивай жуьретна,
Физ хьанач севрен къилив.
Гьиллебазди кьун къетна,
Жуьгьен чарадан гъилив.

Герек хьанач яргъал физ,
Кими туш тlама ахмакь.
И сефер адан гъилиз,
Вич атана буьркьуь вак.

Гафар кутаз, гьалдарна,
Бегемотди вак севрел.
Вак, аюхвал квадарна,
Севрехъ хьана сив - сивел.

Пара севре кьил кьунач,
Къалурнач гьич чин векъи.
Кискисдайбур акуна,
Гьагь! Хьаначни вак пехъи?!

Бегемотда вил аваз,
Севрез гафар элкъуьрна.
Чара атlай севре, пац
Вегьена, вак элгирна.

Куьмек жедай умуддал,
Вак килигна ничхирриз.
Севрекай ам къахкъуддай,
Вагь! Хьанач хьи тек са кицl.

Кьил хурхарик кухтуна,
Бегемот тир муьнуьгъ хьиз.
Адкай куьмек такуна,
Вак амукьна цlугъ ягъиз.

Муькуь ничхирарни хьи,
Гьахь хъавунвай тlеквенриз.
Кискис гудай ванерни,
Хквезмачир къетнен хьиз...

Вуч тарс къачун хьайидкай?
Вуч несигьат гуз жеда:
Яцариз яб гайидан,
Кьил лапlашриз туш жеда!..
03.04.2022