За хиялар чlагур ийиз лезетдив,
Тик цlарара эцигзава цуьквер хьиз.
Гагь рахада зун абурув гьевесдив,
Гагь ишеда чандиз къайи гьекьер гъиз.
Къуват гузва за цlарариз дериндай,
Сабурдалди жуван рикlин гьиссер тваз.
Гагь рагъ гузва за абуруз ифирдай,
Гагь серинриз къайи гарун винел кьаз.
Мани хьана гагь цаварал акъатиз,
Зи бендери лекьери хьиз гузва лув
Мумкин гудач за абуруз аватиз ,
Агъузарни ийиз тадач зерре жув.
Ашкъи къведа тикрардайла дамахдив,
Жуван гелер гьисабдайла , шад жеда.
Гекъиг ийиз куьтягь тежер булахдив,
Умудлу я , зи цlарарин ад жеда.
Кlанивилин ашкъи аваз ргазвай,
Зи булахдай яд хъурай зи дустари.
Дигмиш хьана бегьердивди ацlанвай,
Бахчадизни вегьирай кам халкьари!
Умудлу я, зи цlарарин ад жеда
© Copyright: Фатимат Османова, 2022
Свидетельство о публикации №122062004948
Свидетельство о публикации №122062004948
Рецензии