Чи кьисметар цаварамаз пай хьана,
Гьанлай инихъ зун види я, вун - зиди.
Чун, рикlерин эверунриз гьай гана,
Туьквенава: зун види я, вун - зиди.
Жегьилзамаз дидед - бубад рикlикай
Хабар тежез, жедач чун чи рекьикай.
Геж чир жеда чаз уьмуьрдин гьакъикъат,
Ингье ама: зун види я, вун - зиди.
Дидеярни, бубаярни рекьиз кьван,
Чlалахъ тежер кардизни вун агъиз кьван.
Вуч хъжеда, лап вегь жуван техуьз къван?!
Ша муьтlуьгъ жен - зун види я, вун - зиди.
Аялар чи чlехи хьанва мусанлай,
Гьардаз вичин кlвал я, югъ я, хзан я.
Абуруз чун галачизни хъсан я,
Чун чаз ама: зун види я, вун - зиди.
Са чун туш хьи - дуьня вич икl атанва,
Уьмуьр гьална, гила чна кьатlанва.
Заз кlандайди, яргъидалди датlана
Лугьуз жен я: зун види я, вун - зиди...
ЗУН ВИДИ Я, ВУН - ЗИДИ...
© Copyright: Намик Фарзалиев, 2022
Свидетельство о публикации №122061303032
Свидетельство о публикации №122061303032
Рецензии