Дердерин гьуьле пер кьуранва зи,
Гъамарин рикIел хер хранва зи,
Жегьил уьмуьр куьз икI хьурай сефил,
Руьгьдин цлай-тIуз фер ч1угунва зи.
"Бес гьикIин, вучин?"– суал къвез мецел,
Эверзава заз гатфари къецел.
Гатфарни, зун хьиз, белки, я гъафил,
Кьаз алахънавай муьгьуьббатдин сел.
Дуьнедикай мад дад амач хьи заз,
Бегьерда авай гад амач хьи заз,
Уьмуьрдикай фад хьана икI табдил,
Гъавурда акьар сад амач хьи заз.
Зи рикIяй зайиф гьай акъатзава,
Къавал кьве лифрев къай агатзава.
Элкъвена уьмуьр куьз жезва зелил,
Уьмуьрдин жегьил пай алатзава.
Гьи шагьварди вун ракъурна яраб,
Руьгь рангарив ни чIагурна яраб.
Лалди акуна, хьана зун пехил,
Худа, зи мез куьз рахурна яраб?..,
Дердерин гьуьле пер кьуранва зи
© Copyright: Тамила Хуршидова Салманова, 2022
Свидетельство о публикации №122060607747
Свидетельство о публикации №122060607747
Рецензии