***
Акьада зун гагь-гагь риб хьиз,
Такьада зун гагь-гагь къиб хьиз,
ДакIвада зун гагьни цIиб хьиз,
ТакIан хесет дегиш ая.
Дишегьлидиз хас я рахун,
Минет хьуй ваз, жемир кхун.
Чи арада тахьуй бархун,
Хъел ийимир, саймиш ая.
Тек ваз гана за рик1ни чан,
Хкатдач ваз закай зиян,
Паласдавай, алахьиз ян,
Къени къуьл хьиз дигмиш ая.
Алахъ мийир кутаз синих,
Къени чир хьанвачни къилих?
Кард хьиз гъуьрчехъандин гъилихъ
Жез хьайитIа вердиш ая.
Са тIалабун ава захъ мад:
Закай кефи хаз тахьуй фад,
Вун архаин хьун я мурад,
Зи дугъривал багъиш ая.
Акьада зун гагь гагь риб хьиз
© Copyright: Тамила Хуршидова Салманова, 2022
Свидетельство о публикации №122060607736
Свидетельство о публикации №122060607736
Рецензии