Къвал къвазава куьлуь куьлуь, стlал стlал,
Кьежирзава кьерер, чилер, тамун кlапlал.
Цавун чиниз чlулав цифер агагь хьана,
Цlайлапанри къукърумзава авагъ хьана.
Ингье, хуьруьн дамларивни агакьна ам,
Къал кутунва далдам ягъиз дарам, дарам.
Куьче тирвал инсанар я галтуг - къарагъ,
Чуьнуьх жез кlанз марфадикай къапак, кьурак.
Къвал фирдава гужлу жезва: шарап - шарап,
Къугъваз физ тир бицlекрин кеф ийиз харапl.
Селлер физва гъенерайгъlуз, рекьерайгъуз,
Хурук кткай хъучар, шахар, къванер тухуз.
Чала - чухур цив ацlана вирер жезва,
Тарарикай пешер гватиз, хилер шезва.
Вяде хьана, чlулав цифер, атай хьизни
Цавун чинай хчув жезва, гатай хьиз на.
Ракъун хьелер чlемерукlдай акъатзава,
Кьурурзава ятар, чилик акатзава.
Рапlрапlиз я кьерер, чилер, тамун кlапlал,
Сиргъейри хьиз, кузвай... ийер рушан япал.
МАРФ
© Copyright: Намик Фарзалиев, 2022
Свидетельство о публикации №122052900992
Свидетельство о публикации №122052900992
Рецензии