Къе чизвач, чир жеда амма са юкъуз,
Вуж нив гьи ниятдив агатзаватIа,
Эквеба дуьзвилиз чIанади лугьуз,
Вуж гьихьтин къугъунрай акъатзаватIа.
.
Фендигар, гьахьунив ихтибарвиле,
Ацукьда ви къене емишдин квак хьиз.
Ялтах тамир вуна суфрадин кьиле,-
Вирт гудач, алахъда мизмизар сухиз.
.
Адаз вун герек я, хийир амай кьван,
Тарифда, хъуьреда чинал са тегьер,
Амма, макъам кьуна, вегьида вал къван,
Гъуьлягъдин тIул тушни ахъаюн зегьер?
.
ЧIехи гьиссер ава чIехи рикIера -
Къенивал акси я амалдарвилин.
Види –пунар кутун гегьенш никера -
Шегьреди гудани азаб дарвилин?
.
Ялахъри,дамахиз нин ятIан гине,
Мурадрай уьтквемди садра кумукьун,
Бахтавар хьунилай тапаррин къене,
Хъсан я гьахъвиле текдиз амукьун!
Б.А. май 2022
Гьахъвиле текдиз
© Copyright: Билал Адилов, 2022
Свидетельство о публикации №122052603829
Свидетельство о публикации №122052603829
Рецензии
