Гатфар
Гатфари кутунва къалмакъал вичин.
Кьецlил тlебиатдин абур, гьая хуьз,
Кlевзава, вегьена къацу шал вичин.
Чубарукlрин ван я къецел, къавара,
Булдиз хъуьрезва рагъ, чимиз гьаваяр.
Хъуьтlуьн секинвилер амач цавара -
Ягъизва цlайлапан, къуриз къвал вичин.
Цуькверин атир я нерра - нефесра,
Рикlер гьатзава мад цlийи гьевесра.
Акъатна инсанар кlвалин къефесрай,
Мажал амукьзавач ягъиз ял вичин.
Ингье, кьуьзуь лежбер экуьн кьилелай,
Пайгариз ава тум перцин, гъилевай.
Алудиз туш вилер хаму чилелай -
Пер яна гьазурна кlанда сал вичин.
Мезрейрай, гуьнейрай къарагъзава бугъ,
Булахри шуршуриз, эвериз: ша хъухъ!
Квар къуьневай рушак ква къалабулух,
Ядларкай чуьнуьхиз ийер хал вичин.
Мулдин цуьк экlя я дагъдин ценера,
Живер ахквазама гьеле винера.
Цифер хкаж жезва рагун кlанелай,
Лацу памбагдикай храз цал вичин.
Ийер я гьар легьзе ина, гьар сят,
Са уьмуьр бес жедач ийиз сиягьат!
Сирерин хазина я чи тlебиат,
Инсандиз эхирдал лугьуч чlал вичин!..
23.04.2022 г.
Свидетельство о публикации №122051908238