Дяве

Тупар, мермияр я рахазвайбур къе,
Акьулрин, камалрин мецер киснава.
Регьят я дяведиз зил кьазвайбур къе -
Дуьньядин агъа хьиз чпер гьисснава.

Танкарин чархарик шехьзава чилер,
Цlай кьуна кузава никер, мезреяр.
Зулуз цан цанавай лежбердин гъилер,
Тфенг, автоматар кьункай мерез я.

Инсан пехъи хьанва, динжвал кlанзамач,
Им вуч аламат я, им гьихьтин дуьшуьш?
Акьул саймишзамач, диндихъ агъазмач,
Дяведин паталла алимни кешиш.

Умунвал, ислягьвал ама махара,
Инсандиз вичикай хьанва   аду са.
Кьиникь - гьакlан гьал я, туькьуьл хабарар
Къефил туш, адетдин кар я, ади я.

Я кьуьзуьд ахквазмач, яни хьи начагъ,
Рекьизва аялар, дидеяр шезва.
Накь ваз акунвайди кlвачин кьилел, сагъ -
Къе чилел ярх хьана, цlекlвери незва...

Цикlизва абадан хуьрер, шегьерар,
Бахчайра, мектебра гуьлле къугъвазва.
Сагълам айни гвайдан, жери тегьерар
Аквазни, кьилевай акьул агъвазва.

Пул, девлет кlватlиз я  нефсер тух тежер,
Халкьар азиятрив лигимзавайбур.
Яракь маса гана, ягь - намус кьежей,
Дяведин цlаярал гъил чимзавайбур!..
02.05.2022 г.