Дарих я хьи дарих я

***

Дарих я хьи, дарих я,
Ашкъидин цихъ къарих я.
 Вун гьикI ава? – лагьайтIа,
Зи рикI за ваз ахъайда…

Яргъийралди лугьудач:
Гьа гьакI ама явандиз,
КичIез, элкъвез гьайвандиз…
Килигайла замандиз,
Экъуьгъиз кIанз дувандиз,
Чун кьве патахъ къакъудай…
Анжах кисдач хьи чуьнгуьр!
Гуьнгуьна тваз и уьмуьр…

Дарих я хьи, дарих я,
Ашкъидин цихъ къарих я.
Бес гьикI хуьрай за сабур –
Пуч жезвай руьгь такабур?..
Уьмуьр хьанва эркекди,
Са еб я заз герекди.

Дарих я хьи, дарих я,
Ашкъидин цихъ къарих я!
Агь, батмиш хьуй зи абур,
Эхиримжи чIалара…
Куьз герек я, низ гьабур –
Дердер, кузвай цIарара?..
Дарих я хьи, дарих я,
Ашкъидин цихъ къарих я…
12.04.2021.




***

Гъамарин дагъ кIула гана, накъварин сел агудна,
Жегьил чанар яш тахьанмаз дидейривай къакъудна.
Каш мекь чIугваз дявед йикье чан ганай чи бубайри,
Тикрар хьанва мад къе дяве, чанар къачуз рухвайрин.

Диде я зун, дяве патал ханачир за рухваяр,
Умуд сад тир, жеда абур чи Ватандин архаяр.
Къаларикай, дявейрикай, ялаврикай азад тир,
Зегьмет чIугваз хуш хиялрив, жаван руьгьер абад тир.

Вилериз чи аквазвайбур я хьи маса мисалар,
Гъиле яракь хьурай лугьуз авур тирни дуьаяр?
Умуд квачир пакадин югъ атуникай кичIезва,
Бейнидавай агъзур жуьре фикирри зун эчIезва...

Къуй жегьилар телеф тахьуй, чилел ислягь нур хьурай,
Дявейрихъ ни ялзаватIа, чпин чанар мур хьурай!
Чи чилин шар сузадава, рикI кузвай няс дявейри,
"Дяве негь хьуй! Ислягьвал хуьх!" – гьарайзава дидейри.
28.11.2021.




***

Хиялар, хиялар, хиялар…
Бейнида ргазва суалар.
Фейи рехъ юкьвалай кьатIдани?
Дердер гваз, чун инай катдани?
Хиялар, хиялар, хиялар…
Къвез вилик къваззава аялар.
Мад хквез, акIизва ракIара,
Гьатнава гуя зун ракьара…



***

Им муьгьуьббат яни?
Им мусиббат яни?
ЦIай яни  хъукъурдай?
Къай яни чIагурдай?
Гагь чайгъун жезва ам, гагь тIурфан.
Гагь къайгъу жезва ам, гагь дуван.



***

Хиялар бул авуналди,
Суфрадал чIем, аш къведа жал?
РикIиз гзаф кIан хьуналди,
Тик гъетер акъаш жеда жал?
Гьич санани, заз ван хьайи,
Сад авач, икI зун хьиз кайи…
13.06.2014.



***

Зи вахт, зи мажал,
Уьмуьрни ажал,
Зи шадвални гъам,
Зи зверни зи кам,
Зи рикIни жигер,
Хиялар, гьиссер,
РикIин гьерекат,
КIвалин берекат,
Зи экв, зи нефес,
Зи дилавар мез –
Вири какахьна,
Ахварар квахьна…
Менгинава зун,
Йифехъни йикъахъ
Женгинава зун…