Ислягьбурувай жеда дуьнья ислягьар

(халкьдин камалдай)

Стхадиз стха чиз амукь тавурла,
Рухваяр бубадал алукь тавурла,
Иблисди рекьелай алудда абур,
Лап вини к1арариз акъудда абур.

Рагъ хъфена экуь, к1вале циф жеда,
Гуьлуьшан югъ мич1и хьана йиф жеда.
Вичиз к1ани рехъ гайит1а шейт1андиз,
Дуьнья тешпигь жеда ц1ай квай къажгъандиз.

Чиз амукьдач чпиз чпин багърияр,
Гьак1 нубатсуз экъич жеда ивияр.
Дидейрин гъам-шелди рик1ер ц1урурда,
Накъварин кьел-селди вилер ц1урурда.

Кьуд патай ван техкъвез хийир хабарар,
Ат1уда багърийрин йифен ахварар.
Зар-зибади баятлухда пас кьуна,
Сусар-рушар ч1улав жеда, яс кьуна.

Яш тахьана, жеда ч1ехи итимар –
Кьилел буба аламачир етимар…
Гатфарар мад хкведа,гваз лишанар,
Сурарални акьалт жеда явшанар. 

Сагъ хъижедач амма рик1ерал хирер,
Аламукьда ц1у кайи хьтин гелер.
Гьавиляй гьич тегъин кьилел гунагьар,
Ислягьбурувай жеда дуьнья ислягьар.

Гьич фитнедиз муьт1уьгь жемир, инсанар,
Ша хкудин квай кьван, ч1уру нукьсанар.
Рехъ тагун чи арадавай иблисдиз,
Гьар мярекат элкъуьрин шад межлисдиз.