Садбур, хъвана, жеда кими,
Садан мецел – ширин мани.
Рик1елай физ хзан ва к1вал,
Гьахъ чкадал акъудиз къал…
Сада ялда к1вач патарихъ,
Масад кк1из жед папарихъ.
Сад куьчеда – вак хьиз хуьле,
Акурбурун тухуз зегьле.
Фарфалаг хьиз, гьализ машин,
Эцяйдалди жедач секин.
Садавай вич техжез муьт1уьгъ,
Акатайдаз ийиз экъуьгъ.
Алчах гафар гъида мецел,
Къванер къурда вичин кьилел.
Аватарна виляй михьиз,
Ахквадач гьич вич инсан хьиз.
Садан кьиле къекъвезва гар.
Сад валарик – ширин ахвар...
Садан жибин къецел жеда,
Бурж це лугьуз, варцел жеда.
Аялриз вич так1анарда,
Мел-межлисра усаларда.
Уьмуьр тухуз алчах, тапан,
Гуьни-къара хьанва папан.
Гадарна фад хва кьейд эрекь,
Зегьмет ч1угваз, пелеваз гьекь,
Хуьз алахъна вичин хзан,
Акунайт1а, тир хьи хъсан.
Эрекьбаздиз
© Copyright: Тамила Хуршидова Салманова, 2022
Свидетельство о публикации №122031805844
Свидетельство о публикации №122031805844
Рецензии