К1вачел алачиз, кьилел алачиз...

.КIвачел алачиз, кьилел алачиз,
Чилин циф авай са мичIи йифиз,
РикIе дердер хьайитIани,
Рекье къванер хьайитIани,
ШанкIал хьурай беден михьиз,
Пуд рекьелай алатда зун –
Ви ракIарихъ акъатда зун.
Муьгьуьббатдихъ цIигел хьайи
Къекъвераг хьиз, ви гел хвейи…


                ***
Ви муьгьуьббат аманат я,
цаварилай атанвай.
Ви муьгьуьббат аламат я,
чиг гьиссерив ацIанвай.

Икьван гагьда сада садал
чи танари ялзава.
Къакъатнавай руьгьери хьиз,
чи чанари ялзва...

Ви муьгьуьббат мусиббат я,
ашкъидин цавар хьтин.
Ви муьгьуьббат гьакъикъат я,
аршдавай лувар хьтин.

Ви михьивал, ви къенивал,
ви гьиссерин керчеквал – 
Вири ви тIул аламат я,
гузвай ваз и гуьрчегвал...

Яраб заз гьи хъсанвиляй
вун кьисметдиз акъатна…
Таза кару икI лекьревди
ихтибар гваз агатна...

Амай уьмуьр вун паталди
гьар камуна гуда за.
Жуван рикIни, жуван чанни
вун паталди куда за.



                ***
Ви кIанивал, кьил-кьилелай алуддай,
Лезетрин марф гваз атана гатфариз.
Дерт гвай кьве рикI сад садавди агуддай
Зи лал ашкъи на акъудна цавариз.

Ви кIанивал зулумат къуз куьмек я,
Мекьи йикъуз циферикай рагъ хьтин.
Вун заз илгьам, муьгьуьббат гуз герек я,
ЦIурурзавай зи тIал муркIад дагъ хьтин.

Заз чигзамаз бейадалат акуна,
Вун такур югъ дувандилай залан я.
Агь, гила геж зун гъавурда акьуна:
Вацран йифел серин югъ куьз гьейран я.
10.11.2020.


     БАЯДАР

Са вил ишез, са вил хъуьрез,
Ацукьнава пашмандиз.
Азандин ван япариз къвез,
Ялварзава Худадиз:
"Кьисмет ая, я Сад-Аллагь,
РикIиз кIани гададиз!"

Зулуматдин йикъар хьана,
Виляй къвербур накъвар хьана,
Яраб чIулав ракъар хьана
Аквада жал тахьайтIа?

Ви бахтункай хъвана за яд,
Зун ви вах я, СтIал Саяд.
Им рушарин кьисмет яни?
Им чаз гузвай къимет яни?
Кьезил жезвач зи тIал, Саяд.

Хаз тамир чи ашкъидин къаб,
Зи гьиссерик квач стIу таб.
Вун са тар хьухь кIаниди зи,
Ви серин дарман жедайвал.
ТахьайтIа вун таж хьухь кьилел,
Тажуник девран жедайвал.

Хьухь берекат, зулун бегьер,
ТIурфанрикай зун хуьдайвал.
Хважамжамдин рангар иер,
Зи дердерин ник гуьдайвал.

Агь, дердерал вел къведай вахт,
Ам чIав я хьи авачир бахт.
Жаминаваз цурцун зи рикI
Эцигиз кIандай ви вилик:
Аквадай хьи ваз зи дердер,
КичIе я жез вун дердисер…
19.11.2020.