Мезелияр

Са шумуд юкъуз, начагъ яз, иштягь квахьнавай баладиз дидеди лугьузва:
 - Камила чан, ваз вуч к1анда ? Лагь,чан, дидеди ваз гьазурда. Эгер туьквендин шейэр кIанзаватIа, гьабурни къачуда.
 - Заз са затIни кIанзавач, диде. К1анзавай затI вавай къачуз жедайди туш.
- Вучиз къачуз жедач, я бала? Ам вуч я эхир ахьтинди?- тажуб хьана диде.
 - Сагъвал я, диде чан. Заз чи к1валевайбур садни начагъ хьана к1анзавач.

       ***

 Дидени руш рахазва:
 - Камила, ч1ехи хьайила, ваз вакай вуж хьана к1анзава?
 -Зун гьеле ч1ехи хьанвач кьван. Заз гьинай чида?
 -Ят1а, исятда ваз гьихьтин фикир ават1а лагь.
 - Сифте жува лагь ман, чан диде.
- Заз чидайвал, вакай хъсан муаллим жеда.
 -Ваъ, ваъ, диде чан. Ам хъсан пеше туш. Муаллимди аялриз гзаф тапшуругъар гузвайди я. Абур тамамар тавурла, зун аялриз гьараяр гуниз мажбур жеда. Ваъ, кIан туш...
 - Квез куь муаллимди экъуьгъзавани?
- Эхь, диде чан. "Куьн авачир к1вале ц1уд хьурай " лугьузва.
 - Амин лагьана к1анда, чан бала, ихьтин ихтилатдиз. Алай девирда им лап хъсан экъуьгъун я. Амма вуна лагьанач е вакай вуж жедатIа, чIехи хьайла.
- Закай духтур жеда е, чан диде, духтур.
 - Духтурвал муаллимвилелай хъсан яни, я бала?
- Духтурривай чпин дидеярни, бадеярни, вахар-стхаярни сагъариз хъжеда. Вун, дах начагъ хьайила, за масадаз эвердач, диде, куьн за сагъар хъийида.