Стхадиз

Уьмуьр хьана ч1улав,умударни къуьруь,
Ясдин яйлухар галай алгъанва кьилер.
Стха чи девлет тир,стха тир чи вири,
Рик1 гъамуни т1ушуниз,накъвар я вилер.

Аллагьди чал и ч1улав мусиббат къурна,
Ч1улав буйругъ гана азраил ракъурна.
Стха вахчур гъамуни чилер къарсурна,
Агь,инсафсуз ялавди кана чи рик1ер.

Ц1игел я стха вахъ:мад чун ахквадач,
Гьич ахварай кьванни вун мад чав  рахадач.
"Вун амач",–бес гьик1 лугьун?! К1андач!Ягъадач!
Дердерикай хразва къе чна ц1илер.

Чаз гуьлуьшан тир дуьнья-чилерни цавар,
Лув гана,валай элкъвез,эркин тир вахар.
Хкатна хьи,галамач далудихъ лувар,
Межлисра мад хкаж хъижедач ви гъилер.

Чи экуь гъед хкахьна, дуьнья мич1и я,
Пуч хьана мурадар, рик1ер пич1и я,
Вун авачирла,гила к1валер ич1и я,
Дад хгузмач,шадзамач мехъерар-мелер.

Сефилдиз амукьна пуд балани свас,
Уьмуьрлухди агатна  чахъ и ч1улав яс.
Бубадин вилерални акьалтна хьи пас,
Тамарзлу я ахкунихъ ви зарафат, хъвер.

Чахъ хабарсуз галукьна и залум батин,
Гъамарикай гьуьл жезва къвердавай дерин,
Стха, ви т1вар гьамиша амукьда ширин,
Гьич сагъ техжербур я чи рик1ерал хирер.