Атурай

Дустарин гьал-агьвал гьикI ятIа акваз,
Самурдин и патаз Эйваз атурай.
Пайгардин чкадал цIийи улуб гваз,
Пагьливан хьиз къугъваз,къугъваз атурай.

Ватанпересвилин гьиссер виликна,
Юкь хана мажалдин,вири гъиликна,
Дердияр, белаяр чална чиликна,
Камранан къуьн-къуьне аваз атурай.

Мугьманрин къалинвал-тав кIвалин дамах,
ЧIагъандин яхцIур мез-межлисдин къаймах.
Лезги авазрикай жедайвал булах,
Расимни  Магьира галаз атурай.

Алпандин тарихар бинеда кьуна,
Чи садвал, битаввал субут хъувуна,
Дустарин шадвилер лупада туна,
Абирни шикилар чIугваз атурай.

Сабур хуьй къведайла, тавурай тади,
РикIелай тефирай зи дуст Видади,
ЧIалакай пай ганвай вичиз худади,
Къифледин абур я, ам кваз атурай.

Ша лагьай теклифдин хабар галукьна,
Лув гана сергьатар кьулухъ амукьна.
Суьгьуьрдин хаймадал вири ацукьна,
Бести вахни юкьвал алаз атурай.

Касвилин къанунар хуьз я чун гьазур,
Гьерен кьил галудиз хци я гапур,
Ахпадал вегьирай Кьвеварни Самур,
Гелхеназ хьуй сефер, яргъаз атурай !