Зи яр

Шаксуз зи яр, вун гуъзелрин гуьзел я,
Кхьиз жедач ви акунар гафаралд,
Вун акунихъ зун гьамиша цIигел я,
Гьикьван вацIай авахьда яд гатфаралд?

ТIалабзава вуна муьгьлет загай мад.
Уьмуьр физва дегишариз йикъа йиф.
Мус ийида зи кузвай рикI вуна шад,
Зи уьмуьрдин рагъ, зи гуьзел лацу лиф?

Вун такур югъ заз йифелай мичIи я,
Гьич са затIни зи вилериз аквазвач,
Экуь дуьнья кьуд пад михьиз ичIи я,
Вучиз зи рагъ вун зи пеле акьазвач?

Гекъиг жедач са куьнигни жегьил вахт,
А гуьлуьлуьшан, зун вал дуьшуьш хьайи югъ,
Заз бахтуни ишигъ гайи югъ, зи бахт,
А бахтавар, зун ваг таниш хьайи югъ.
Заз килигиз кIанзава гьар легьзеда,
Ви вилериз алай цавун ранг вили,
Машгьур хьанвай тIвар къе михьиз Куьреда,
Заз кичIезва вуна ийиз зун дели.

Мумкин туш вун рикIелай фин инсандин,
Садра акур ви буй-бухах, зи ашкъи,
Хьайилани кьил са чIехи хзандин,
Яшар хьана хьанвай михьиз кьил рехи.

Вун галачиз шадвал жедач зи рикIе,
Зи вилерин экв, чарасуз заз герек,
Яргъалайни вун акун я бахт еке,
Инанмиш хьухь, зи гафарихъ вун керчек.

За ийизва ваз зи кIани яр минет,
Вучиз икьван гузва вуна заз азаб,
Аллагьди заз халкь авунвай зи кьисмет,
Я эхь, я ваъ лагьана це са жаваб.
                1957 г.