Хуьруьн дамах, кIвенкIвечи,
Гуьлназ, келер ацана,
Физва вацIун къерехдиз,
Авахьзавай ац1ана.
Келер къацу дугуниз
Фараш векь нез чикIизва,
Селимхандин мегьрибан
Вилер рушал алкIизва.
Желб ийизва руш вацIу,
Магнитди хьиз чIугвазвай,
Гуьзгуьдай хьиз алахьай,
Рагъ авай цав аквазвай.
Гьазур жезва руш тадиз
Гьахьиз вацIун дериндиз,
Винел шагьвар къвекъвезвай,
Бахчада хьиз сериндиз.
Руша гъилер хкажна,
Пекдин перем хутIуна,
Кьилин кукIвал тIарамдиз
Залан кьве киф кутIуна.
Элкъвена руш килигна,
Кин кваз къерех-бужахдиз,
Хкадарна кьвалалай
ВацIун чими къужахдиз.
Исятда цав элкъвена,
Рушан кIаник аватна,
Яд хъичена кьуд патахъ,
Чланбарар акъатна!
Гуьлназ
© Copyright: Садых Гаджиев, 2021
Свидетельство о публикации №121121807498
Свидетельство о публикации №121121807498
Рецензии