Ярдиз минет

Ви сирдикай зун гъафил я,
КIевиз хуьзвай яна дапIар.
Вун такур къуз зун сефил я,
Зи гьалдикай яхъ са хабар.

Чан зи ашкъи-гьава яр,
Бегьердавай багъ хьтин,
Чан зи тIалин дава яр,
КIуфак хъвер квай рагъ хьтин.

Заз ви рикIин сир
ХьайитIа дуьз чир,
Къе икьван зи рикI
Жедач хьи гъарикI.

Вил вегьена килиг хъсан,
Гатфариз кьуд пад диганвай,
Гатфарни вун сад я, инсан,
Бенд жедайвал икI чIаганвай.

Чан зи гатфар, зи рагъ яр,
Муьгьуьббатдин булах гвай,
Чан зи рикIин чирагъ яр,
Дагъд маралдин дамах гвай.

РикIел гъана гьахъ,
ИкI рикI кузвай вахъ,
Заз це са жаваб,
Ваз жеда суваб.

ТIебиатди шад ийизва,
РикI, гатфарин вахт тирвиляй,
За ваз минет, дад ийизва,
Вун зи руьгь, зи бахт тирвиляй.

Чан зи рикIин гьевес яр,
Зи бахтунин лувар гвай,
Чан зи чандин нефес яр,
Зи уьмуьрдин фанар гвай.

Ви рикI ятIа саф,
Заз лагь тек са гаф,
Эбеди зун ви
Дуст жеда кIеви.

Садра гузвай затI я чаз чан,
Жемир икьван инсафсуз вун,
Цавун агъа, къушарин хан,
Са тарландин кьве лув я чун.

Чан зи рикIин мурад яр,
Ериш жегьил жейрандин,
Чан зи гатфар, зи гад яр,
Эхир мус хьуй гьижрандин?
Вучиз зун вуна,
Суьгьуьрда туна,
Хана икI гуьгьуьл
Ийизва сефил?
                1956 г.