Акваз-такваз рагъ мад синек акатна,
Бахтавар югъ акъатна са легьзеда.
Ажеб хъсан хьана чун чав агатна,
ВацIун кьве хел санал гьалтай дегьне хьиз.
Вун ракъинин нур я кIвалин дакIардай
Аватай, зи ахварик квай вилерал,
Заз акуна вун адан хуш дидардай,
Гьамишанда ктаб алай гъилерал.
Вун патав гвай чIавуз зи рикI секин я,
Агакьайдан хьиз мураддив рикIевай.
Вун галачиз яшамиш хьун четин я,
Бахт жагъуриз галат тийиз рекьевай.
Эцигна ви капан юкьвал къизмиш рикI,
Ви рикIе шад ашкъидин нур куькIуьрдай,
Заз кIанзава гьамишанда къе хьиз икI,
Кьуна ви гъил-гъиле физ са жигъирдай.
Вун герек я заз, кIаниди нефес хьиз,
Зак кутунвай муьгьуьббатдиз хас лувар.
Зун гьавада тунвай ашкъи-гьевес хьиз.
Заз авунвай гьар югъ бахтлу шад сувар.
Мегьрибандиз гъетери хьиз гузвай нур,
Ви вилери ийизва зи рикI чими.
Гьамишанда элкъуьрнавай гарухъ хур,
Вун елкен я, зун ви кIаник квай гими.
1978 г.
Вун герек я заз кIаниди
© Copyright: Садых Гаджиев, 2021
Свидетельство о публикации №121121807389
Свидетельство о публикации №121121807389
Рецензии