Лезги руш

Виш гишир квай гам храдай гъилери,
ХупI ажайиб гуьрчег я вун, лезги руш.
Гъетери хьиз ишигъ гузвай , вилери,
Ви акунрал гьейран я зун, лезги руш.

Ви пIузарар къизилгуьлдиз ухшар я,
Лап са тIимил ачух хьанвай, лезги руш.
Сарар лацу гевгьерар я, къашар я,
Зун ашукь хьун патал ханвай, лезги руш.

Беден таб квай тегьенг хьтин чи багъдин,
Къамат гуьзел, кIалубар дуьз, лезги руш.
Ериш кьезил, суй жейрандин Шагь-Дагъдин,
Зериф я вун надир цуьк хьиз, лезги руш.

ЧIулав кьве киф аватнавай хъалчахдал,
Гьарма сад са гъил кьван яцIу, лезги руш.
Темягь фида вун фидайла булахдал,
Дамахарна лиф хьиз лацу, лезги руш.

Лавгъа жемир за ви тариф авурла,
Фадлай рикIи вун чIугунвай, лезги руш.
Кхьиз тежер ви гуьрчегвал акурла,
Муьгьуьббатдиз халкь авунвай, лезги руш.

Гардан лацу къугьдин гардан дамах гвай,
Буй-бухахдиз лап кутугай, лезги руш.
Хушбахтавар, шад, лезетлу булах гвай,
Къавламиша зун татугай, лезги руш.
1969 г.