Накь азраил атана

Накь азраил атана,
Лагьана заз ахварай:
« Къаст ава ви туьд кьадай,
Ви ажални т1егъуьндал-
Тахсиркар хьиз илит1дай".
Яргъи  гъилер акурла,
Хуьз хъхьанач гьич сабур,
Акъатна зун къапарай.
Налугьуди, зун гапур
Тир акъудай  къакъарай.

- Зун секин тур, алат вун,
Регъуь хьухь ви суфатдиз.
Заз чилел вуч акуна,
Вегьез  чиг чан вафатдиз?
Сефилармир балаяр ,
Кап алтадиз хвей харуз.
Экуь къастар рик1емаз
Тухумир на зун суруз.
Инсафсуз, им я зулум,
Язух ша, мийир магьрум.
Т1алабна, дад авуна:
«Муьгьлет це заз мад вуна».
Ван атанач азгъундиз,
Мад адаз за минетна:
«Са хтул кьван за мет1ел кьан.
Ахпа ша зи нефес кьаз,
Жуван кеспи чизва ваз.
Зи веледар,  багърияр,
Мет-кьил гатаз  шез жеда.
Эхь, пехилар шад жеда,
Багърийриз эвез жедач.
Мад са балад дерт акур
Дидедин рик1 пад  жеда».

Ваъ, Азраил к1еви тир,
Фикирдилай квахь тийиз.
Я кич1е туш, я регъуь.
Къакъат хъийиз, агатиз.
Зи виляй вил акъудиз,
Язух ч1угвар гьал тушиз.
Гьик1 к1ант1ани, авурай,
Лагьана, за т1алабна:
-Са югъ кьванни хзандихъ
хъижедай заз вахт хце.
Веледрив кьве келима
Рахадай заз бахт хце.
Балаяр зи рик1евай,
Са гунагьни чин тийир.
Лап ажугъди кьуна зун,
Гадарна хъварц жувалай.
Квахьна бедендин зурзун,
Гъил гапурдал фена зи.
И гьал акур Азраил,
Ракь акур  гьа чинер хьиз,
Катна, кьулухъ  ягъиз вил,
Татайди хьиз зи патав.
Секинарна жува-жув,
Фикир фена бейнидай:
Чун кьвед санал авайт1а,
Къведачир ам ажал гваз.
Акурла чун  буш жедай,
Гьа атайвал хъфидай.
Вичиз масад жагъурдай...