Къе са диде...

Къе са диде ацалтна зал,
Рик1е дердер къалин тир.
Рахаз тежез, руьгьдавай т\ал,
Адан гьалар четин тир.

Ачух тир цав, нурара – чил,
Гуьлуьшан тир, рагъ алай.
Амма диде тир лап сефил,
Адан вилел нагъв алай.

Рик1 хъуткьуниз,шехьиз-шехьиз,
Ахъайна заз вичин дерт.
Яб гайила и фагъирдиз,
Амукьна зун хьана перт.

«Хзан патал уьмуьр фейи,
Гьазаватда хьана  зун.
Умуд кутур рухвайрини
Агажарна кана зун.

Чан эцигна хвена вири,
Рухваяр я ч1ехи зи.
Уьмуьрда бахт акур кьери,
Хьана ч1арар рехи зи.

Алахънай зун абурук кутаз
Инсанвилин хесетар.
Ч1ехи хьунухь тербетдик кваз,
Чириз руьгьдин девлетар.

Хуш тушт1ани пис амалар,
Веледар хуп1 к1анда хьи.
Гьабур патал я зи т1алар,
Лап чанни къурбандда хьи.

Квадра ч1уру хесет-бине,
Дидедин рик1 шад ая т1ун.
Дагъвидин т1вар кьуна вине,
Къени крар фад ая т1ун.

…Гьикьван нурлу хьайит1ан югъ,
Адахъ гала мад мич1и йиф.
Хайибурун квез къадир хьухь.
Тежедайвал ахпа гьайиф.