Магьир лукьман

Зул я! Тама ава чумалар к|ват|из,
Дири я, к|убан я аял ч|авуз хьиз.
Къуьнел чанта алаз,  лап таран к|ук|ва,
Манийрив к|валахдив зун эгеч|нава.

Диде-таран к1аник гьарайиз ала:
-Туьквена эвич1а аман чан бала.
Нуьк| хиз ацукьнава  вун шуьк1уь хилел,
Кич|езва аватиз ам хана чилел.

…Ац1урна чантаяр гьатдайла рекье,
К1вачерихъ кицикар акуна векье,
Дидеди давамна:- хъсан дигмишрай,
К1ват1на руб чрада аяз акьурай.

Мадни заз гьар са хъач, гьар тамун нямет,
Хушдиз къалурзава желб ийиз дикъет:
И там чи виридан я магьир лукьман,
Авач адав гвачир т|аларин дарман.
 
К1ерецар, шуьмягъар т|ебиатдин пай,
Ажайиб кьватияр аламатар гвай,
Къвакъварни жик1ияр агъзур азардин,
Дава я, рик1ел хуьх на чан дидедин.

Инияр мелгьям я рик1ин дердерин,
Туьнтвал секинарда начагь нервийрин.
Ч1ухлумп1 гьамбархана я витаминрин,
Авач ам эвездай зат1 мекьивилин.

…Уф, к1вачиз хак фена, гьатнава са т1ал,
Авахьиз дабандай ивидин ст1ал.
Михьзава  булушдин хилекай накъвар,
Гватнавай калушдин ч1угваз гьайифар.

…Ахварай аватна, алукьзава яр,
Вегьена дак1ардал йифиз храй зар.
Амач дидедин гъил зи къанвай гъиле,
Рик1 я т1арзавайди кьефесдин кьиле...