Гъил къачу...

Гъил къачу на, азизди, на гъил къачу,
Вири тахьай кlанивилин патахъай.
Гъил къачу зи гьиссерилай, гъил къачу,
Артухдалди рикlе амаз, чим тагай.

Гъил къачу за вал хкажай ванцелай,
Ви рикl хайи легьзейра, гьахъ акваз жув.
Гьар зун хъел кваз элячlай а гуьрцелай-
Сефердилай на регьимдив гъил къачу.

Уьмуьр тек са муьгьуьббат туш, гьайиф хьи,
Кlанивилинд са легьзе я, са кьатl я.
Гьадавайни жеда ашкъи зайифди,
Акl тахьунал чун - шукурда за гьатта.

Гъил къачу рикl тахъ - тахъдаваз, гуьзетиз
Зи рехъ, чандиз кьарар тахьай йикъарлай.
Гьар легьзедлай чи акъатай, гьуьжетиз,
Са-сад хайи - такабур хаз тахьана.

Гъил къачу зи вав геж хтай йиферлай,
Тахтайбур - туш зи уьмуьрдин гьисабдай .
Гъил къачу зи са легьзелух "кеферлай",
Ахьтин йифер муьгьуьбатдин кьасаб я.

Зайифвал хьиз кьадайбуркай туш къайгъу,
Авач буржи гьич садани заз гайи.
Тек вавди я, мергьематдив гъил къачу,
Кьабула зи и пашманвал, геж хьайи!..
06.10.2021 г.