кёчгюнчюлюк

Ноябрны экиси - гюрге кюн-
Миллетими къралыбыз сюрген кюн;
Джакъсызлагъа аскерчиле чабхан кюн;
Къарачайны эшиклерин джабхан кюн...

Бир минг тогъузджюз къыркъ ючюнчю
Тау миллетим болгъан эди кёчгюнчю,
Каъарачайгъа "сатлыкъ" мухур салдыла,
Мюлкюн, джерин аштапирле алдыла...

Джигитлеринг къазауатда тёге къан,
Тиширыула мал вагонда бере джан...
Ненча сабий ачдан кёбюб къатдыла,
Ненча къартны Итил суугъа атдыла?!

Къазахстаннга, Орта Азиягъа сиз тюшюб:
Кече сууукъ - ашсыз, юйсюз сиз юшюб...
Алан халкъым къум тюзлеге джайылыб,
Эгеч-къарнаш бири-биринден айырылыб...

Кюмюш кямарны гырджыннга джоюб,
Алтын сыргъаны сют ючюн къоюб,
Къыйын чыкъдыгъыз биринчи джазгъа,
Сагъышда, тюшде къайта Кавказгъа.

Джигер Къарачай!терлеб суу иче:
Ким кюйюз согъа, ким чепкен биче,
Ким чыкъды джазда себерге мамукъ,
Ким таусулду, тёге джыламукъ...

Онтёрт джылынг ётдю онтёрт ёмюрча,
Къум тюзледе сен кюйдюнг отда кёмюрча,
Кюрешгенсе, аямайын санынгы,
Ишлеген бла къалдыргъанса джанынгы.

Къарачайым къайтды майны кюнюнде
Джангы джашау башлай эски юйюнде,
Тау хауадан солуб, кёкюрек тоялмай,
Къобан сууну ичиб, кёлюнг толалмай.

Кавказ таула! Сизден айырмасын Аллах!
Сынатмасын энди бизге бир палах!
Къурутмайыйкъ тилибизни, тинибизни,
Унутмайыкъ къара Гюрге кюнюбюзню!