Вучиз?

Москвадай хайи ватандиз хтанвайди чир хьайила, Вакъиф муаллимдиз цIийиз акъатнавай зи ктабрикай кан хьанай. Абур агакьарун паталди зун КцIаравай Тарих чирдай музейдин вилик чун икьрар хьанвай чкадал вахтунда атанвай.
Музейдин вилик лацу перемар алай, гарданда галстукар авай са кьадар вилик- кьилик квай жуванбур санал акурла, руьгьдик лувар акатай хьиз гзаф хвеши хьанай заз.
Ина рагьмет хьайи Муслим Муртузаеван 100 -йисан юбилейдиз талукь мярекат кьиле фирвал тир. Мярекатдин мугьманрихъ галаз ихтилатарзавай Вакъиф муаллимди зи ктабар къачуна, заз Кесиб Абдуллагьан, Ашукь Нуьсретан ва Римма Гьажимурадовадин ктабар савкьат гана, вахт аватIа залдиз атунни теклифна.
Вакъиф муаллимдин и теклиф за хушвилелди кьабулна, жуван бицIи хтулни галаз залда авай вахарин ва стхайрин арада ацукьна.
Чи лезги вахари, стхайри нубатдалди Муьслим муаллимдин экуь уьмуьрдикай ихтилатна, ада халкь патал авур къуллугърикай гаф кудна, азербайжан чIалал чпин рикIин гафар лугьуналди ам са экуь, къени инсан хьиз рикIел хкана.
Гьа икI, заз Муслим муаллимдикай гзаф малуматар хьана, ам рикIивайни халкьдин дамах авуниз, чешне къачуниз лайих кьегьал хва хьанвайди чир хьана. Суруз нур къурай вичин!
Амма, а йикъалай инихъ са суалди сакIани заз секинвал гузвач...
А мярекатда зи япар хайи чIалахъ цIигел хьана, рикI цIрана, руьгь ругуна...
Тек са Вакъиф Гьажиагъаева хайи чIалал вичин хуьруьнвидкай ихтилатна.
Куь чан сагърай, играми шаир!
Завай эхирда кьван я акъвазиз яни кисна хъфиз хьанач. Руьгьдик акатай лувар ханваз, ихтияр къачуна жуван КцIариз талукьарнавай кьве шиир кIелна хтана.
За вири миллетриз, вири чIалариз гьуьрметзава.
Я стхаяр, вахар, я жуванбур: вучиз куьн дидедин чIалал раханач, вучиз????
Куьн лезгияр туширни?
Муслим муаллим лезги туширни?
Квез адан руьгь шад жез кичIе хьанайни?