Сыту п1эрэ анэм и гур къызыхэщ1ык1ар? на кабардинс

Сыту п1эрэ анэм и гур къызыхэщ1ык1ар?
Бжьэхуц щабэщ,ар и быным тегужьеик1ау.
Зэми жырым ещхьу мэжыр,къыпхуэмыгъэчэн,
Армырамэ,гум телъ гуауэр дауэ ишэчын?

Сыту п1эрэ анэм и гур къызыхэщ1ык1ар?
Пэплъэу ар щхьэгъубжэм 1утми и бын къэгувам,
Гур мэузыр,мэгузавэ,куэди къегупсыс:
Псым хегъахуэ,егъэгъуащэ,щ1ы1эм ирегъэс.

Жыжьэу зы ныбжь гуэр илъагъумэ,бынырау къыщохъу,
Нэхэм къытрехьэ пшагъуэ,нэпсри щ1эз мэхъу!
Гуф1э нэпсыр елъэщ1ыжри щэхуу мэгъуэлъыж,
И гузавэр къуэм щигъэпщк1уу,анэм зеущэхуж.

Нэху щыхунк1э къик1ухьами,ар къыхуэк1уэжащ,
Алыхьышхуэм шыкур хуэпщ1ри Уи гур тыншыжащ.
Анэ дапщэ щы1э гугъэр быным хахыжауэ,
Хэти жыжьэщ,адэ-анэр ящыгъупщэжауэ.

Хэти игъуэ нэмысауэ дунейр ибгынащ,
Зы хэк1ып1э лъэпкъ ямы1эу ар я1эщ1эк1ащ.
Анэм и гур имылъыжу зэми къыщохъуж,
Сытым ар къыхэщ1ык1ами,езым имыщ1эж.

Йолъэ1у и гум къэувы1эну,къару имы1эж,
Ар мэузыр,ар екъузыр,ар къемыдэ1уэж.
Сыту п1эрэ,йогупсысыр,къызыхэщ1ык1ар
Си гур,апхуэдиз игъэвми,къару къезытар?

Гум къару къезытыр гугъэрщ,гугъэм егъэпсэу,
Уимы1эжми,уэрщ,и анэрщ,зыщыгугъыр псэр!
Сыту п1эрэ ди анэгур къызыхэщ1ык1ар?
Гум уеуами,щхьэ щыт анэр птегужьеик1ау!?

11.09.21гъ