ТУШ

Вичин оппонент вуж я,гьихьтин кас я чир тавуна векъи жавабар гудай, кубутвал тавуна ихтилат тухуз тежедай,диде-бубадиз сеперарунал кьван вичи-вич агъуз авудзавайбуриз я зи гафар.Я абурин алимвили,яни абури халкьдин рекье авунвай,ийизвай ва идалай ахпа хъийидай хъсан крари ихьтин гьерекатар гьахъдиз акъудзавач...

Хъел эцигна лугьузвач за,гьам зи гафар лянетар туш,
Умудда са файда жеда,гьакl гьаваян зегьметар туш.

Беген тушир квез,а пата ава ахьтин рухваяр хьи,
Чир хьанайтlа,лугьуз жедай,им чаз акур журетар туш.

Са дидедин веледар я,амма бахтар сад хьанач чи,
Кьве тах дахди гайиди чаз гьаман айни серветар туш.

Алукьнач чал,къакъудна халкь,кьулай пайна кьве патаз чун,
Ийизвай чун къе тахсиркар, куьбур гьахъ тир туьгьметар туш.

Кьисметди чи гужар пайна,муьтlуьгъ хьанач амма чи руьгь,
Къе чаз тегьне ягъизвай "дуст",вид садвилин рябетар туш.

Самур вацlун цацар алай часпарривай хуьз жедач чун,
Чун дагъларин азад къушар-чаз часпарар сергьятар туш.

Зун алим я лугьуз ужуз дамахар кваз къвекъвезвай кас-
Алим хьуниз мад юн ава, инсанвал хуьн регьят кар туш.

Чка хьана-тахьана,гьа сивиз талукь тушир гаф луз,
Жуван абур квадарун гьич алимриз хас суретар туш.
01.09.2021 г.