Кьурди хьиз дуст хуьзни алахъ

Дуст кьун регьят я,-лугьузва,
Чи лезги халкьдин мисалда.
Хуьн четин я, и кар чизва,
Амукьзавач гьич хиялда.

Хъсан я дуст хьайит/а  эгер,
Апайдай санал дерди- гьал.
Шад ийидай мелни  мехъер,
Кьезилардай рик/евай т/ал.

Дустар ава мециз ширин,
Зегьердилай рик/ туькьуьлбур.
Дустар ава рик/ ипекдин,
Къилихариз лап четинбур.

Мез ширин дуст кьамир куьне,
Мез шейт/ан я , а инсандин.
Винелай ваз ягъда къеле,
Рик/е аваз ц/ай, алпандин.

Къалур ийиз вуч лап хъсан,
Ширин гафарал рахада.
Алачирла ч/ехи душман,
Чан аламаз вун жакьвада.

Чан-чан лугьуз,чухвада кьам,
Гьатай ч/авуз вич к/евера.
Ахпа гудач гьич ваз салам,
Яц/ гьатайла тик къуьнера.

Дустар ава гайи буйругъ,
Рик/елай фад алатдай.
Жагъай ч/авуз вичиз къуллугъ,
Кьил баштаниз,вич катдай.

Амма тек-бир ава дустар,
Рик/яй-рик/из рекьер авай.
Багьавилелди кьаз ви т/вар,
Са хиялар, сирер авай.


Чир жедайди къадир т/уьр фан,
Вафалувал, сир хвейиди.
Гьам я халис ви дуст хъсан,
Рик/ивайни вун к/аниди.

Шаир ая куьнени гьахъ,
Дустар хьунухь чи дамах я
Кьурди хьиз дуст, хуьзни алахъ,
Мягькем  дуствал чи даях я!