Гьужумдалди атай ч/улав цифери,
Вили цавар ч/улаварна, к/евирна.
Чиляй лув гуз чубарукри, лифери,
Мукъаятвал хуьн шарагриз эмирна.
Гугрум, къукърум дяве ава цавара,
Рагъни к/евна, ч/улаварна чилерни.
Язух къвезва ц/велин тар заз, фугъара,
Гару гатаз, хазвай яц/у хилерни.
Ц/айлапанар! Пехъи хьанва т/ебиат,
Сел хьиз атай марфади чил гатазва.
Эхирзаман хьайиди хьиз гьакъикъат,
Сефил хьанвай цав хъит/кьиниз,рахазва.
Анжах чилер шад хьайиди аквазва,
Марфадин яд хъвазвай хъар-хъар ацалтна.
Пад-пад хьанвай чил тух жезвач,дак/вазва,
Архайиндиз яд фт/иниз, агалтна.
Инсанрикни акатнава теспача,
Садакьа кьаз, ялвар ийиз Аллагьдиз.
Гьайванарни кьегьат хьана фир чка,
Гьарнихъ катна, далда чкад суракьдиз.
Садлагьана экуь хьана цавун тагъ,
Яргъи руша вичин рангар экъуьрна.
Цавун юкьваз хкаж хьана чими рагъ
Мад чилерал къизил нурар куьк/уьрна.
Пехъи хьанва тlебиат
© Copyright: Фатимат Османова, 2021
Свидетельство о публикации №121070702927
Свидетельство о публикации №121070702927
Рецензии