ВУЧ ЧИДА

Легьзед къадир течир садаз заман вуч я-вуч чида?
Рикlе регьим авачирдаз аман вуч я-вуч чида?

Вил ахъайна гьахъ-адалат кlурун кlаник кутурдаз,
Хъсанвилин къадир вуч я,яман вуч я-вуч чида?

Гьалал бегьер незавайди амалрилай чир жеда,
Рикl михьидаз фитнечидин  гиман вуч я-вуч чида?

Алцуриз пак,михьи бенде тапархъандиз къулай я,
Рикlе шайтlан авайбуриз иман вуч я-вуч чида?

Мал-девлетди вилер буьркьуь авунвай са арсуздаз,
Кlвале къафун тежез,фу тlуьн яван вуч я-вуч чида?

Уьмуьрда фу маса къачуз туьквендай,нуш авурдаз,
Хьран ялав,никин кlаз вуч,харман вуч я-вуч чида?

Вафалувал,буржи вахгун,аманатдин пак ният
Кьатlун тийир ягьсуздаз дуст,мугьман вуч я-вуч чида?

Вичин хийир авачир са мярекатдик кьил кутаз
Кlан тийидай къванциз миллет,ватан вуч я-вуч чида?

Гьич садрани суварикай яргъаз тахьай дагъвидиз,
Какъатунин туькьуьл гьасрет,гьижран вуч я-вуч чида?

Мугьуббатдин чешмедай яд хъун тавурдаз,Намик,лагь,
Ашкъид кайи рикlин кlани-дакlан вуч я-вуч чида?
14.06.2021г.