***

ИРИД   ШАКЪА

(Киригрини  Гилийрин хуьрерин
махлукьдиз бахшзава)


Кьулан вац1ун  генгвиле               
Ава  ирид шакъа.
Шакъаяр авахьзава
Секинз, гагь  юргъва.


А шакъаяр муьт1уьгъриз
Алакьдай  ксар
Хьана. Вик1егь, циц1и яз,
Экъеч1дай вац1ай.   
               

Кьулан шакъа йигин тир,               
Яд аваз пара.               
Муькуьбурни секин тир,               
Квачир гъулгъула. 


Хийир-шийир авай хьиз,          
Фин-хутунни  авай.               
Куьруь мензил авай хьиз,          
Улам - камни авай.

               
Муькъвер, эляч1ун патал,               
Къуша тир вац1ал.
А муькъвер рик1ел текъвер                -
Хьана ксар кьегьал.


Эляч1дай а кьегьалар               
Жагъуриз  улам.
Хт1ун тийиз к1вачеллай      
Чекме,  краб*,  шалам.


Гъвеч1и шакъаяр камдай,
Къванцел кам  вегьиз.
Вац1ун са пай  рамдай,
К1вач кьежин тийиз.

 
Агакьайла,  ат1угъай,
Кьулан шакъадал,
Пек – партал  хт1унна
Кьадай паядал.


Гъилер кьуна т1арамдиз
Сада муькуьдан,
Зарб квай цяй, уьткемдиз,         
Экъеч1дай ксар…


Вац1ун  кьве пата авай
Мукьва - кьиливал,
Генан мукьвал агуддай               
И  адет  тирвал.


Мел-мехъер, хийир -шийир,
Мугьман хьун-атун,
Герек яз, хгутдачир,
И адетдин пун…


Гила маса вахтар я,
Квай вичик азаб…
Вац1ун кьве кьер часпар я,               
Халкь  авур кьве пад.


Амач чун мукьвал ийир
Уламар гуьт1уь,
Эзерет вахт къакъуддай
Мензилар куьруь…


Кьве кьер кьунва къулпари*,-
Ч1улав, эйбежер…               
Гваз къекъвезва, т1иш к1еви,
Ни ч1угвар киц1ер.


Жидаяр хьтин, уьцуьх жер,
Цаз алай симер,
Къаних яз гузетзава         
Авун патал хер…

               
Эгеч1из тахьун шакъайрив,-
Тушт1ан вич са дерт,      
Гьайиф, а адет амач,
Махлукь я хьи перт…


Виш йисарин адетар
Квахьзава чи ик1,-
Часпар лугьур  завалдин,
Таб тагур, парцик.               
               
               
 Кьулан вац1ун генгвиле
Ама ирид шакъа.
А шакъаяр тушир кьван               
Мукьвавилиз  хата!..

2007 й.

Шиир  куьруь авуна ганва.


*Краб(ар) (нугъатдин гаф) - калуш (галоша)
*Къулп(ар) – часпардин тарч  (пограничный столб)
 
Гъилин хат1арин дафтардай.