Самур вацlун муькъвеллаз заз са руш акуна,
Вацl сейриз тир акъвазна лап муькъвен юкьал ам.
Гару къумрал киф гардандал аруш авуна,
Хкажзавай блушкад пlипl, кьецlилиз скlам.
Хиялриз вуч атанвайтlа,хъуьрезвай пlузар,
Патав гвай зун аквазвачир шаксуз хьи адаз.
Зун лагьайтlа,акваз адан ийервилин зар,
Афсун хьанвай и шикилдин хуш легьзеяр кьаз.
"Яруш, вацlун гьи патай я,лагь садра кван,вун?
Азад яни рикlе гьеле ашкъидин чка?
Вун гьи патай ятlа-жеда акси патай зун,
Рикlяй рикlиз зани вуна са муьгъ кутада.
Жаваб гана тlебиатдин эвер гунариз,
Рикlера саф са ашкъидин шемгъел куькlуьрда.
И муьгъ вич са шагьид жеда чи и гьунардиз-
Чна вацlун и пад,а пад лапни кухкlурда"...
...Самур вацlун муькъвеллаз заз са руш акунай,
Жегьил рикlяй фейи хиял лугьуз тахьай сад.
Рагъул я яд,хъел ква жеди зи а кис хьунай,
Вацlун вичин рикlяй хьана жеди а мурад...
Самур вацlун муькъеллаз заз са руш акуна...
© Copyright: Намик Фарзалиев, 2021
Свидетельство о публикации №121042604377
Свидетельство о публикации №121042604377
Рецензии