Паччагьар
Цlвекlрейни кьадачир раятар вичин.
Тахтунин,гьуькуьмдин хьанвай начагьар,
Зайиф ватандашдиз къалурдачир чин.
Халкьдин квадарнава ихтибар,нуфуз,
Амма гьисабзавач им са иксиквал.
Халкьдин векил-ругуд,вич я лугьуз-туз,
Балкlанар гьалзава акъатна юкьал.
Ришвет вердиш гьал я назиррин къене,
Къачузвай маважиб лугьуч хьи бес я.
Са капаш угъридин хьанвачни уьлке-
Бубадлай аламай саки мирес я.
Дустуни дуст ялда,мукьади-мукьад,
Хала-хатурвилин гьакь-гьисаб авач.
Са хупl яд гуч хьи ваз-къаргъ хьана якъалд!
Кесибрин дердиник гьукуматар квач.
Паччагьри тунава халкьар чеб-чпиз,
Цавараллама кар:белки гайитlа!
Йетен килигиз я халкьдин жибиниз:
Гумай кьве кепекни къахчу хьайитlа!
Духтурдиз,маллимдиз амач гьакь-гьуьрмет,
Инжинар алвериз мажбур хьанава.
Гьалал фу тlуьнуьк мад кумач са рябет,
Жегьилрин тербия лап чlур хьанава.
Кесиб халкь тек ама тlвегъуьндихъ галаз,
Дерт-бала мад текдиз атанвач налагь.
Назирар бункерра ацlукьна нез-хъваз-
Инални гьабурин паталла Аллагь.
Мус къведа цавари ракъурдай жаза?
Яраб дуьз адресдиз аватдатlа ам?
Къведатlа цавариз халкьарин суза,
Аватlа гьанани ришветдиз икрам?
11.04.2021 г.
Свидетельство о публикации №121042604335